Начальник онаго добраго воинства не от простого народа бяше, ниже от поселянска препутия, но пастырь Христова стада, страж бодрый церковныя доброты, труба златокованная благочестия, сосуду избранному яко ревностию, тако именем согласный, архиерей чудный Коломенска града: сего богатство ревности, изобилие разума, постоянство твердости, время оное на светильник явления изнесши, пресветло всем показа: егда бо Никон собор собравши коварством вся подъиде, якобы древлепечатныя книги с древлехаратейными и древлеписменными несогласны, исправити подобает, прочии архиереови и священнаго чина простою верою повериша тому, мняше истиннаго того пастыря быти: но не Павел тезоименный верховному, емуже очеса и внутренняя отверста; позна овчим одеянием прикрытаго волка, дивным дерзновением о древлецерковнем благочестии толико сопротивоста: елико Никону на онаго и ко вселенским патриархом писати жалобныя книги. Глаголют же неции, яко по Никонову принуждению тогда подписовахуся к свитку российстии архиереи, аще к написанному, аще к ненаписанному, известно о сем глаголати не хощу: дивный же Павел Коломенский архиерей дивное подписание предивно начерта, не сложение некое, не соглашение кое, от младенчества страха бываемое показа: но мужественный церковный глас пречудне назнамена. «Аще кто от обычных преданий Святыя Кафолическия Церкви отъимет, или приложит к ним, или инако развратит, анафема да будет». Сим начертанием великомужественным Никоново сердце яко оружием преострым тако всекрепко прободеся, откуду Никон не може презлобныя ярости удержати, но призвав предивнаго Павла своима того рукама (оле всезлобныя ярости) бияше по священному священнаго лицу: не усрамився священства великаго чина, не устыдевся святости честных седин мужа, ниже апостольских убоявся правил, извержение наносящих таковая дерзающым, отсюду себе показуя удобно являше; яко не пастырскою ревностию, но мучительскою лютостию, нововнесенныя ввождаше догматы; что убо доблий Павел, еда убояся досады? еда смалодушествова о безчестии: никакоже, но непреклонен яко столп в древлецерковнем благочестии стояше, и многая тому предлагаше Никон патриарх увещания, и лестная словеса, и прежде, и тогда, и послежде, еже преклонити того к своему намерению: не улучи на малодушного, но на крепкаго и великодушнаго воина. Предлагаше Никон древлепечатных книг простонаречие, неудобреное красотословие: противу полагаше Павел простое истинны Евангельския, рыбарственное апостольския проповеди: Никон предлагаше правление книг новопечатных нуждно быти: яко по правилом грамматическа художества, действоватися происходит: Павел противу полагаше, не по правилом грамматикийским новшества полагаются: кия убо правила трисоставный Крест с просфор отметают, кая грамматика двема перстома знаменатися возбраняет? Кий синтаксис пятию перстами благословляти уставляет: кая пиитика аллилуйя трегубити узаконяет? Не по правилом грамматики седмицу просфор в службе отмещете, символ приложеньми и отложеньми умножаете, поклоны в посты отъемлете. Сих всех грамматика, ниже учит, ниже законополагает, но древнее предание Святыя Кафолическия Церкве учительства и гласы святых церковных учителей, и греческих и российских, обычай всекрасный древлецерковный, неизменно от грек приятый, неизменно до нас сохраненный, неизменно до конца содержатися должный, по написанию святых отец: мы убо древнему законоположению церковному последуем, мы заповедания святых отец соблюдаем. Еще же и клятв отеческих и запрещений боятися должно глаголющих: проклят разоряяй уставы отеческие, и непременныя уставы церковныя, яже положиша отцы твои. Никон предлагаше греков новопечатныя книги, нынешния обычаи, днешняя чиносодержания, имже последавати увещеваше, Павел противополагаше греческия новопечатныя книги, древлеписменным греческим весьма не согласны: занеже печатаются в латинских странах, и растленне печатаются. В них же и Духа Святаго исхождение от Отца и Сына догматствуется, и обливание в крещении, и ина латинская заблуждения привсеяшася, откуду и не суть достоверни: противополагаше и о грецех, яко нынешния обычаи греческия древним греческим обычаем и преданием несходны суть, триперстное их знамение, и пятиперстное благословение, несогласно древлегреческим учителем Феодориту, Мелетию, Петру Дамаскину, Никифору Панагиоту и Максиму Греку, словесы своими богодухновенными двема перстома и креститися и благословити научающым: несогласно и всей Древлевосточней Кафоличестей Церкви, иконными изображении, двоеперстное сложение всеобдержно изъявляющей, несогласно и святым апостолом, чрез дивнаго евангелиста и живописца Луку, иконным изображением, и Самого Христа Бога двема перстома своя ученики благословивша показующим. Предлагаше о грецех, яко под страхом агарянския державы живуще неволею, и нуждами стеснени, оным сообщаются, и многая чинов церковных, и преданий преступают. О чесом посланный от Иосифа патриарха Арсений Суханов свидетельствует. Показоваше Никону древлехаратейный устав словенский, писанный в лето 5900, в немже яко о поклонех во святый Великий пост, и в прочыя, тако и на прежесвященной (литургии преждеосвященных даров. – Ред.), и в вечер Пятьдесятницы с коленома главы преклоняти повелевается, и прочыя уставы и обычаи согласно старопечатным книгам. Сими и иными показании, Павлова богодухновенная уста, Никона всего безгласна всего осрамлена показаша; иже не могий увещаньми духоносну одолети мужу, на ярость и гнев паки обращашеся: книгу оную «Устав» отъяти повеле, самого богоносна Павла темнице предаде. Писав на него константинопольскому Паисию, стояние и крепость мужа поведая: и оттуду о сем возответствие прият, еже в «Скрижали» в послании Паисиеве обретается. Таже Никон патриарх, егда ниже страхом, ниже биеньми, ниже темницами и оковами того преклонити не возможе; во оземствие заточения посылает, во един от убогих монастырей именуем Пальеостровский, к северным странам, в Олонецтем уезде, близ Студенаго моря лежащий, тамо предивному Павлу не малое время долготерпетельно препроводившу: и ясным гласом и светлою душею древлецерковнаго благочестия светлость свободно проповедающу, не возмогоша стерпети новинцы ревности Богоносна мужа: паки оттуду к новоградским странам отвезшее (оле немилостивыя суровости) по томлении многом священнаго епископа, несвященнии в срубе соделанном огненней смерти, немилостивно предаша. Тако всесвященный Павел, приносяй Господеви священныя жертвы, себе жертву преосвященную Владыце принесе, огнем вседобре испечеся, добрый бысть пастырь за догматы отеческия свою душу предаде всерадостно.
|
