Грядем к сказанию осмыя тысящи 162 году, с Никонова патриаршества от того же времени сей предивныи страдалец противяся Никонову новопреданию, и опасныи хранитель святоотеческих древних содержании священныи архиерей Божии человек Павел Коломенский сей за имя Исус Христово, и за древлецерковное православие послан бысть в заточение во Олонецкой уезд в Палеостровской монастырь, идеже некое время пребыв, тамо свободно поучая народы и утвержая жити во святоотеческих предании и благочестии ревновати. Сей подражатель во
всем отцем святым, и приходящим убо от великороссийския церкви новокрещенных покрещевати истинным крещением заповедаше, новорукоположенных никако приимати иереов, но и заповедаше весма всем правилно сказуя быти истинным христианом хотящим правым евангельским путем по нем вестися, не приимати таковых ни единыя тайны, о чем свидетельствуют вси священнии мужие, яко же Соловецкия обители иноческаго чина, и священноиноцы, ихже бе великии собор тоя святыя обители, иже последи вси от новолюбителей, страдальческою колесницею в небесная села послани быша. Тако и прочии множайшии священнострадалцы, и елико иноческаго чина, и мирскаго народа людие древнии. Некогда убо добрии Павла епископа послушницы вопросиша сего святаго отца, предлагающе ему великия своя нужды во иерействе рекуще: «О преподобне священныи наш страстотерпче святыи и великоподвижныи отче, аще твоя святыня от нас в будущая преселится, и угаснет на земли святая и безкровная жертва, и священство до конца погибнет, кто нам возжет священства светилник святыя Божия службы, понеже, священнейшии наш отче, имееши воздательную благодать во иереох, и вси святыя церковныя тайны тобою освящаются, аще ли ты, священнейшии отче, сего светилника не возжеши, то воистинну угаснет в нас видимое священство, и тогда всем верным велия будет нужда нынешняго времени и грядущаго по нас братии нашей». Тогда отвеща к ним священныи епископ Павел: «Братия моя духовная и друзи о Христе, еще великороссийская церковь имеет три светилника в недрех своих, их же святолепне содержит в себе, занеже хранят древния нашея святыя церкви непорочное благочестие. На сих полагатися вам подобает. Сии священии мужие великия ревности исполнени суть». Тогда паки вопросиша священнаго сего мужа епископа Павла честинии нецыи пришедшии священноиноцы, и иноцы, и простии благочестивии людие, рекоша ему: «О ком сия глаголеши, святыи наш владыко, и которыя светилники светло горящия древлесвятым благочестием показати хощеши, просим твою святыню явити нам сих и не остави сирых чад своих?» Рече же им духоносныи Павел: «Макария глаголю митрополита Новогородскаго сего вам светилника показую, хранящего в недрех своих свет истиныи древняго благочестия. Втораго реку вам подобна первому светилника Маркела архиепископа Вологоцкаго. Сей бо такоже хранит древния святыя церкви разум, в ней же бяше крещен, и рукоположен истинно. Тако же и третияго светилника глаголю вам Александра, епископа Вятскаго. Сей аще и остави престол свой, не соизволи прияти Никонова новопредания. Затворися в келии, и с плачем и рыданием древнее благочестие в недрех своих сохраняет. Обаче три сия светильника на своих еще престолех тогда и во своих епархиях и рукополагаемых своих священников укрепляху, еже новин не приимати и сами служаху и благословляху яко же исперва прияша от святых пастырей, по древлецерковному обычаю совершаху Божия службы. Аз же своего престола изгнан есмь ныне, уже что имам сотворити, яко своего престола изгнан есмь? Вы же еще святых отец и древлецерковное предание содержите твердо, и буди на вас Божие благословение, от ныне и до века! Еще же вам глаголю другóм моим, яко есть мужие небеснаго звания и нераздорницы святыя церкви. В вас самех есть мужие, священноиноцы, и иноцы, и простии благочестивии мужие боящиися Бога, сами себе опасно и безбедно соблюдают, могут и приходящия к ним пользовати и помогати в приключающихся нуждах, друг другу помогайте. Буди на всех вас благословение Господне от ныне и до века!» И посем времени мало прешедше преподобныи и священныи отец наш Павел пророчески прорече о своем отшествии к другóм своим: «Ныне, друзи мои о сострадалцы Христовы, чаю сокраго моего от вас разлучения, и разрешитимися бренныя моея плоти, и со Христом жити желаю. С вами же горя духом всегда желание мое есть, вас не оставляти». И потом времени не в долзе к новогородским странам отвезен, и тамо повелением всезлобнаго Никона (оле дерзновенныя смелости!) безстуднии и зверообразнии суровейшии слузи лютаго мучителя по многом томлении, и по многом мучении несвященнии архиереи всепреосвященнаго Божия архиерея увы жалостно окончаша святаго суровии мучители. В срубе бо соделанном на то, яко агнец непорочен, огненной смерти немилостивно предаша в лето 7164. И тако всепреосвященныи Павел епископ принося Господеви всеосвященную жертву наконец самого себе в жертву чисту и святу Господеви принесе, страдальческую прият кончину, и в небесная сила яко огненною колесницею вознесен бысть. Еще поведаю вам о игумене Досифеи Новогородския области, и о соборе священных епископ и прочих священных мужей и богоносных отец соловецких. Посем же явися ин муж свят житием, словом и делом велии в добродетелех просиявыи яко солнце в новогородских пределех игумен именем Досифей бывыи Никольскаго Беседовнаго монастыря разстоянием от Тихвины три поприща имеющь. Сей муж старостию и добродетелию украшен, такожде ради новых догматов и надлежащего ради гонения и принуждения остави свой монастырь укрываяся по разным местам яже часто прибегая к пустыни некоей Куржецкой обители во строение преподобнаго отца Ефросина, в ней же и святыя церкви бяху, в них же священныи отец Досифей собираяся со многими великими отцы и спостники и со знаменоносцы, понеже бо тамо от многих стран собравшеся (и) от Соловецкия обители, нецыи боголюбивии, и тамо службу Богу за весь мир выну приношаху. Приходящии же которыя от великороссийския церкви людие крещении по новым книгам и уставом покрещевати судиша тех всех по соборному уложению, по благословению священных епископ и игуменов, и архимандритов, и священноиноков, и иноков, и всех священных мужей за древлецерковное святое благочестие стоявших мужественно, священноепископа Павла Коломенскаго, и священнаго Макария митрополита Новогородскаго, и священнаго Маркела архиепископа Вологоцкаго, священнаго епископа Александра Вяцкаго, и священнаго архимандрита Никандра духовника царева, и священнаго Илии архимандрита Соловецкаго, и сего игумена Досифея Беседовнаго Тихвинскаго, и велиревностнаго страдалца Аввакума протопопа, и Логина и Лазаря, и Никиты, и Иова, Варлаама, Илии, и Пафнутия, Иоанна протопопа московскаго, и соловецких, и всего священнаго и иноческаго собора отец, и прочих знаменоносных мужей великих и духовных. Бысть о сем соборное уложение всех сих отцев, во означенной пустыне, в ней же первыи председательствуя священныи епископ Павел Коломенскии изоустным своим приказанием и заповеданием Досифею вышепомяновенному игумену, и своеручною ему данною грамотою на собор принесенною, в ней же и анафемы на новоявльшияся никониянисты и на их новыя небогоугодныя догматы положени суть вечныя клятвы. Подобне же и Макария митрополита Новогородскаго. Такова же бе прислана грамота с келейником его старцем Симеоном, в ней же вся Никоновы новшества анафематисует, и никаких таин от тех приимати не повелевает. Такоже и от Маркела епископа Вологоцкаго грамота своеручная подобна сим присланная. Тако же и от Александра Вяцкаго епископа своеручная грамота прислана бе. В них же во всех нововыниклая никониянская небогоугодная предания и догматы анафеме предаются. Такожде и от соловецких отец соборная грамота бе. И от вышеозначенных страдалец своеручная их внесошася грамоты, в них же во всех Никоном внесенная вся новшества отлагаются, вся таинства тех новодействуемыя отметаются, и всяко не приятни во христианех творятся. По них же смотряху священнии они отцы соборне всяко разсудивше, и по правилом апостольским и отеческим, и по святособорному изложению блаженнаго и многострадальнаго Филарета патриарха Московскаго и всея России уложиша за приятие в великороссийскую церковь явственных латынских множайших и сквернейших ересей приходящих от тоя весма покрещевати, и рукоположение тех не в рукоположение положиша, но второе рукополагати таковыя от самех священных епископа, аще будут Божиим благоволением блюдомы негде древлецерковнаго благочестия священнии архиереи. Аще ли же кто сим погордев от непокорства своего соборное уставление священных отец и архиепископ и боголюбивых страдалец преступит или нарушит в коей либо вещи положения противно святых отец и не будет покарятися святей церкви, той да отлучится от всего общества христианства, и не вменится в православных христианех, но за расколника да причтутся таковии и раздиратели. Подобне сему и Афанасии патриарх Цареградскии в то время на Москве быв и Никонова новшества низлагает и отметает святыя церкви ниже крещение от таковых, ни рукоположение, ниже ино что повеле приимати, но отметнути последующи древних святых отец собором. И яко же бывыи древнейшии священномученика Киприяна иже во Африце собор тоя области со епископы помянувше, в нем же бо повелевается от всякаго еретика и расколника святыя церкви крестившихся от таковых паки покрещевати правоверным совершенно в три погружения. Сице бо тако уставиша и заповедаша всем грядущим по них святыя церкви российским сыновом тако действовати и хранити таковая во спасение душам христианским, даже до скончания века. К сим же и руки своя приписаша и принесоша соборное уставление священному Павлу епископу и многострадальному, той же прият оное и похвалив разум священных мужей, яко и кроме самоличнаго присудствования пастырей своих священных архиереов, боголюбезнаго уставления в соборней святей церкви во утвержение верным священнии мужие уложивше постановиша богоугодне и подписа тое священнострадалныи священною своею рукою: Павел епископ юзник Коломенскии смиренныи архиерей подписуюсь. Такоже и протчии о них же рехом выше архиереи оное соборное уставление принесенное им подписаша своеручно, и Соловецкой обители в книгохранителницу оное, в сохранение блюсти послаша, и всему тех собору запоручиша, и тако сии священнии мужие по совету и по благословению всесвященнаго епископа Павла Коломенскаго, в та времена во оной области новогородской во изгнании суща сего бывша и прочих вышепомяновенных архиереов, благословением же и завещанием приходящих убо от великороссийския церкви новокрещеных повторяху истинным крещением, сами же иже в Господню смерть единою святою соборною апостольскою церковию единым от православных точию даемым. Такожде и новорукоположенных иереов никако же приимати, но и заповедающе всем по ним стояти хотящим не приимати таковых. О чем свидетельствуют вси страдалцы Новогородския области, и соловецтии всесоборнии отцы, и Олонецкия страны вси пустыннии отцы. За что и крови своя всеусердне даже и доныне о Господе проливают. Аминь. Деяся сие в лето 7164, месяца генваря, в 7 день. (Сборная рукопись XVIII века. БАН. Собр. Дружинина. № 127, л. 266–276 об.).
|
